Бардейов і Свідник на літо приготовили турістічны влакы

Почас літа можуть турісты і домашні в окресах Бардейов і Свідник одвезти ся турістічныма влаками. Єден з них ходить на трасі Бардейов – Бардейовскы Купелі, другый ходить із Свідника до Долины смерти під Дукльов.

Як інфомровав аґентуру TASR Радомір Янчошек, директор Областной орґанізації турістічного руху Шаріш – Бардейов, бардейовскый турістічный влак завезе людей ку найінтереснішым і найнавщівльованішым місцям Бардейова і Бардейовскых Купелів.

„На будькотрій заставці можуть подорожуючі выступити, посмотрити собі красы історічного центра Бардейова ці навщівити забавный парк, і пізніше наступити на влак і подовжовати на дразі до Бардейовскых Купелів,“ повів Янчошек. Ціла драга влаком тримать приблизно годину, і денно влак ходить сімраз.

Куплены листкы суть цілоденны, зато люди можуть выступити і наступити будьде. Почас подорожіня влаком вдяка авдіопродовникови дізнають ся множество інтересностей о сучасности і минулости Бардейова і Бардейовскых Купелів.

„Заставок є девять, траса зачінать на Раднічній площі при скулптурі ката, в Бардейовскых Купелях стоїть коло літнього купалиска, сканзену і під колонадов,“ доповнив Янчошек.

Турістічный влак у Свіднику ходить каждый тыждень од середы до неділі, аж до кінця літа. Траса є Свідник – Долина смерти, і ходить трираз за день. На трасі є девять заставок. Почас подорожіня так само дістануть подорожуючі інформації о інтересностях реґіону. І Свідник продавать листкы на цілый день, значіть і там мож выступити і наступити на далшый влак будьде.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА