«Спомний собі Лемку» – бесіда з Іваном Дзядиком про дітиньство на Лемковині і жытя на чужыні – віторок, 21.00 год.

Днес в проґрамі «Спомний собі Лемку» запрашам до выслуханя бесіды з Іваном Дзядиком, котрий народил ся в 1939 році на західній Лемковині, в селі Фльоринка. Окрем споминів рідного села, оповіст нам тіж про своі дітячы рокы на Лемковині, пережытя вчас ІІ Світовой Войны, період выселінь та першы рокы жытя на чужыні, де родина Дзядиків, як і вельо інчых Фльоринчанів, замешкали в селі Михалів на Нижнім Шлеску.

Іван Дзядик то культурний і церковний діяч, долголітній член Стоваришыня Лемків, орґанізатор Лемківскых Ватр на Чужыні, конферансиєр та гумориста – част його гуморесок маме змогу чыти на антенах радия лем.фм в циклю «Лемківскій Гумор», дописує до часопису «Бесіда». Є тіж автором книжкы про його подорож до Святой Землi.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.