Біциґлями по обох странах границі

Як подає на своім сайті Повітове Староство в Ґорлицях, в Бічу прошла робоча стірча з участю старосты та самоурядів, охочых партиципувати в проєкті будовы новых біциґльовых і пішых пути, якы мали бы находити ся на обшыри ґорлицкого, яслиского та коросняньского повітів і, што більше, мали бы ся лучыти з путями  Пряшівского Краю. То пути по обох странах границі, котрой переходжыня было колиси можливе лем в окрисленых місцях. Днес, завдякы шенґеньскій зоні і браку граничных контроли, одкрывают ся нескінчены можливости схоснуваня такых обставин.

Естимувана вартіст проєкту то 5 мілийонів евро, а карта проєкту буде зложена в рамках Европейского Фонду Трансграничной Спілпрацы. На тот момент, охочы самоуряды рыхтуют пропозициі трас, рахуют іх долгости і кошты будовы. Посеред пропозиций проєкту єст переведіня пути през нехоснуваны граничны переходы в Бліхнарці і Ожынній. Новы пути мают іти далеко од публичных доріг, жебы прогулькы были, по перше, безпечны, а по другє – приємны.

Цілю проєкту єст навязаня близшой спіплрацы з полудньовым сусідом Польщы та збільшыня атракцийности і туристычной оферты тых часты обох держав. То тіж дальшы можливости розвитку і розбудовы пути – мож іх прилучыти до уж істнуючых або твореных професийональных медженародовых одтинків сіти EuroVelo (заложыня проєкту то побудуваня 14 долгоoдаленых біциґльовых пути, якыма мож переіхати цілу Европу – смотрте на мапку долов).

Новы пути можут быти получены з GreenVelo, то проєкт 5 трас, якы мают вести през обшыр воєвідств тзв. східньой стіны Польщы (схема пониже):

(ґрафіка горі: Vintage vector designed by Freepik)