Ближыт ся конец вывозу токсичных одпадів з Ґорлиц

Іщы того місяця має закінчыти ся черговый, і найпевнійше послідній уж етап ліквідациі нелеґального складовиска одпадів на обшыри ґорлицкого Ґлімару.

Разом, в тым етапі, з бывшой рафінериі мают усунути веце як 2,5 тис. тон ріжного рода небезпечных субстанций. Занимат ся тым фірма Мо-Брук. Тырват дочыщаня великого розміру резервуарів, а дотепер вывезли веце як 1,8 тис. тон зобраных гын бочок, маузерів ци палет выполненых напр. лікарствами по терміні.

«Решта одпадів в чыслі 160 палет є перепаковувана і жде на спедицию. Кількіст одпадів, што треба іщы усунути, є тяжка до окрисліня, але рахуєме, же є то коло 250 кубічных метрів» – інформує Мо-Брук.

Вывезіня одпадів за 75 млн зл…

Справа вывозу небезпечных субстанций з обшыри ґорлицкой рафінериі тырват уж два рокы. Коли пала Рафінерия Нафты Ґлімар, скоро нашли ся «підприємливы» особы, што выдумали заґаздувати обшыр закладу і зорґанізували там величезне нелеґальне складовиско. Коли вказала ся інформация, што гын наскладали, з проблемом што з токстичным смітьом зробити конечно остало місто.

Ґорлицям признали на тоту ціль 40-мілийонову дотацию з Нацийонального Фонду Охороны Середовиска, додатково містецкій самоуряд взял 8 млн зл пожычкы од воєвідства, передал тіж своі середкы.

Коли зачала ся акция вывозу, вказало ся, што 5 тис. тон одпадів то не єст вшытко.

«Вчас реализациі вывозу, вказало ся, же складовиско є векше, як выказали початковы рахункы, а цілковите усуніня одпадів буде вымагало чергового фінансуваня» – коментувал Рафал Кукля, бургомайстер Ґорлиц.

В червци/юнію тр. місто підписало анекс до першой умовы, котрый обнял вывезіня дальшых 2,5 тис. тон за близко 25 млн зл.

Конец уж неодолга

«На тоту хвилю цілый кошт вывозу одпадів з бывшой рафінериі перебільшат 75 млн зл, зато тоты грошы сут необхідны, жебы заґарантувати безпеку мешканцям, што є гев пріоритетовом квестийом» – пояснял бургомайстер.

Послідні одпады мают вывезти до 20. жолтня/октобра. «Унешкодливліня одпадів, значыт осягніня еколоґічного ефекту, буде проведене в терміні поданым в умові – до кінця червця/юнія будучого рока» – подає Мо-Брук.

Фот. Піотр Секула