В середу 28. мая того рока о 18.00 год. в грекокатолицкій церкви св. св. Космы і Даміaна в Бортным одбуде ся вынятковий концерт церковной музыкы – Бортняньскій в Бортным. Выступит Академіцкій Камеральний Хор ім. Димитря Бортняньского, якій зосереджат найліпшых і найздібнійшых выконавців і абсольвентів музычных шкіл і консерваторий Украіны.
Хор є лавреатом вельох медженародовых фестівалів і конкурсів. В його репертуарі находит ся клясычна і церковна музыка, але тіж народна украіньска музыка. Особливе місце в репертуарі хору занимат творчіст самого патрона хору – Димитря Бортняньского, світовой славы композитора, якого предкы выводят ся зо села Бортне на Лемковині (родина Шкуратів). Од назвы рідного села взяло ся назвиско Бортняньскій, якє принял іщы отец композитора, Штефан Шкурат, по тым як за хлібом мусіл еміґрувати з Лемковины. Сам Д. Бортняньскій выховал ся уж поза Лемковином. Село предків мал одвидіти в своім жытю раз, а почута народна лемківска музыка мала остати в ним на все.
Тепер Бортняньскій вертат до Бортного раз іщы – в творах і в музыці принесеных хором ім. Бортняньского.
В проґрамі концерту окрем Бортняньского, почути буде мож іщы творы І. Стравиньского, П. Чеснокова і Ґ. Свірідова.
Радийо ЛЕМ.фм тримат медияльний патронат над коцнертом.
Коментарі