Братсклад рыхтує перший цілістю русиньскій гіп-гоповий кружок!

Лемківска музыка барз часто асоциює ся нам лем з фольклором, граньом на гушлях, або гармоніі. Через долгы рокы в русиньскым середовиску бракувало модерных музычных жанрів. Днес можеме заявити, же рап по русиньскы вертат до гры! Хоц Братсклад на лемківскій гіп-гоповій сцені зродил ся більше як 10 років тому, а по правді основал тоту сцену, уж тепер інформуєме, же рыхтуют новий кружок істо і лем в русиньскым языку!

13. лютого/фебруара т.р. зачали ся награня до першой во світі цілістю русиньскоязычной гіп-гоповой платні пн. Rus-Y-Rap. Награня проходят в шкотскым Единбурґу. На кружку найде ся 15 творів, што дає вшыткого аж 80 минут русиньского рапу. Од языковой страны, коректуру текстів в лемківскым языку робит Олена Дуць.

Як заявлят єден з лідерів ґрупы Братсклад – Ваньо Дзямба (Ya’an), до довершыня цілого проєкту бракує лем ґрафіка, котрий запроєктувал бы окладинку новой платні. Кєд нашла бы ся заінтересувана особа, артисты просят о контакт.

Вєдно з том новином, Братсклад принюс нам короткій промомікс пн. Бесіда.

В награню вызвучал фраґмент твору пн. Dobr-Y-Den (Besida). Тот і декторы другы тексты Ya’an-a можете найти на його сайті www.mistrzyaan.com .

Братскклад то ґрупа основана в 2004 році через трьох братів, Русинів з Пшемкова на Нижнім Шлеску. Творят єй Ваньо (Ya’an), Ярослав (J-A-R) та Андрий (AnD) Дзямбы. Дотепер братя награли три кружкы: 2004 – LP „Nie Ma Na Co Czekać, 2005 – LP „Bratosfera / RapDarmo” і 2008 – EP „Toasty” (AnD & Ya’an).

Як бесідує Ya’an – новонагрывана платня то недокінця твір цілого Братскладу зато, же буду іх выконувал лем я. Творы сут новы і кус інчы – дорослійшы і барже глубокы, неє кавальчыків о горілці 🙂 – додає Ваньо Дзямба. Тексты і музыка, над котрыма робит Ya’an, были написаны на переломі 2015/2016 років.

Як іде о можливіст позысканя награной платні – буде мож єй придбати за кошты продукциі, бо заложыня єст такє, жебы каждий, хто лем хоче, міг тото послухати – реляцийонує спілучастничка проєкту, Олена Дуць. Выданя кружка плянуване єст на осін текучого рока.

Звідали сме тіж Ya’an-a, яка ріжниця медже рапом а гіп-гопом: Гіп-Гоп то барже культура, рух, а Рап – точно єден з єй штырьох елементів, занимаючий ся “ґаданьом до мікрофону” (дальшы 3 то: DJing, breakdance i skating). Од 90. років стало ся модне (а для ня правдиве), же єст іщы пятий елемент, або під-елемент самого Рапу: знаня; яко же хтоси єст рапером, єст тіж гіп-гоповцьом – бесідує редакциі лем.фм лідер Братскладу – Ваньо Дзямба.

Про більше інформаций чытайте на фейсбуковым фанпейджы ґрупы. Кєд лем являт ся наступны дрібниці – заявиме о них на нашым портали.

всітри фотоґрафіі: фейсбуковий фанпейдж ґрупы