Буде мало новых беркутів в Карпатах

Жыючы в польскых Карпатах беркуты того рока токуют слабше як в попередніх роках. Не вшыткы пары заберают ся будувати і однавляти своі гнізда. В тій части Польщы жыє коло 30 пар тых птахів, іх популяция в державі чыслит коло 35 пар.

Доктор Мариян Стуй з Комітету Охороны Орлів бесідує, што таку ситуацию спричынят найпевнійше недостаток ідла. Минулого рока не обродило насіня бука, было мало жолудя і інчого насіня лісовых дерев. А што за тым іде – не розмножыли ся в більшым чыслі грызуны і дрібны звірята, якых ідят м.ін. бекруты. Додал, што в зимі не было тіж на тілько снігу, котрый дал бы захороніня для грызунів, жебы могли ховати ся перед драпіжниками.

Беркуты уж прилетіли, скорше як все, бо на початку лютого/фебруара, чому допомогла хвиля, але птахы не выказуют заінтересуваня розводити ся. Беркуты складают два або єдно яйце в третій декаді марця. Высідуваня тырват коло 40 днів. В більшости примірів  ховают лем єдно пташа. Коли выклюют ся два, сильнійше елімінує слабше, родиче не інґеруют в ривалізацию.

В Польщы найбільше беркутів є в підкарпатскым воєвідстві. Гніздує гын 20 пар тых птахів, сім пар в Саноцко-Турчаньскых Горах, по шіст в Низкым Бескіді і Бєщадах, а єдна на Перемышльскым Погірю.

В малопольскым воєвідстві по дві пары з гніздами найдено в Сандецкым Бескіді і Ґорцях та по єдній в Пєнінах і Татрах. В Жывєцкым Бескіді (шлезскє воєвідство) однотувано дві пары.

Поза Карпатами беркуты гніздуют іщы лем над морьом – в Словіньскым Нацийональным Парку.

Долгіст тіла беркута більша єст як 80 цм, а розмах крыл то два метры. Птах тот іст головні малы цицакы і птахы. Імат м.ін. заяці, куны, молоды серны, домашні коты, совы, крукы. Пікуючы в льоті, може досягнути скоріст 160 км/год.

Гнізда беркутів находят ся в трудно доступных місцях, в коронах высокых дерев, найчастійше шпильковых, або на скалистых поличках.