«Были якысь задачі, їх треба было доводити докінця» Віра Ґіріц  – проґрам  «Голосы русинів Подкарпатя» – середа, 18.10 год.

Стартує 1-ый із серії інтервю з Мадярьска. Днешній розговор быв записаный в просторах Мадярьского парламенту з русиньсков посланкыньов Віров Ґіріц. І бісідовало ся  о Русинах в Мадярьску, котрых ту є подля останього перепису населіня з 2011-го року понад 3300.

У 1993-ім році урядом посткомуністічного Мадярьска быв приятый закон, котрый  дозволив заложіня сістемы самосправных адміністрацій про комуніты націоналных меншын, в тім чіслі і про Русинів. Закон дозволив вытворити орґаны самосправ, кедь конкретне проценто членів общіны, а то є 20-25%, подасть петіцію на їх заложіня. Крітерії про ідентіфікацію Русинів або любой другой націоналной общіны суть доста вольны. Дакотры русиньскы самосправны общіны екзістують у населеных пунктах, де жыє лем дакілько Русинів, до них так само можуть быти прикапчаны Мадярі, котры мають предків Русинів, або просто ся інтересують русиньсков културов.

Віра Ґіріц – русиньска посланкыиня в мадярьскім парламенті. Родачка із вароша Ужогрода. Од 1978-го року жыє в Мадярьску. У 2002-ім році першый раз была выбрана предсидательков  Вседержавного русиньского самосправованя. Пак была перерва од 2006-го до 2010-го року, і потім назад од 2010-го до 2014-го року стала предсидательков. І у 2014-ім році, коли першый раз на выборах мож было говосовати на національных посланців, Віра Ґіріц попала у парламент. На даный час выповнює свій другый мандат.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА