Перед ювілейным Х Медженародным Бієнале Лемківской/Русиньской Культуры Стоваришыня Лемків печатало дальший номер свого пресового орґану. В «Бесіді» но. 3 (162), май-червец 2018 р. мож чытати м.ін.:
- Павел Малецкій, Новий заряд Руской Бурсы – загальне зобраня 2018;
- Севериян Косовскый, 70 років православной парохіі в Ліґници;
- Богдан Ґамбаль, Ансамбль Розтока одсвяткувал свій ювілей;
- Богдан Ґамбаль, Ярослав Горощак – лемківскій писменник і діяч святкувал ювілей;
- Севериян Косовскый, 130. річниця смерти Емілияна Чырняньского – ректора Ягайлоньского Університету;
- Петро Трохановскій, Мій марец 1968 (продолжыня).
Окрем реченого в найновійшым номері ґазеты мож чытати актуальны выімкы з доступной нерусиньской пресы. Внутрі находит ся вкладка з фотореляцийом з дотеперішніх едиций креницкого бієнале. Попри знимках редакция помістила фраґменты репортажів про пят минулых едиций подіі писаных для «Бесіды», ци тіж в ній передрукуваных. Продолжыня про бієнале в дальшых номерах часопису.
На послідніх странах мож чытати смоминове слово про бл. п. Параскєву Бреян (1924-2018) і бл. п. Анну Косовску (1927-2018). Дале находит ся слово про покійну Любку Сеґеди-Фалц (1932-2018) та єй верш Моі корені.
Двомісячник «Бесіда» то часопис Головного Заряду Стоваришыня Лемків, выходит од 1989 рока, присвячений єст збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.
«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.
Коментарі