Червена Ружа в Сіґеті

В неділю, 15. мая 2016 р., в селі Вышня Руня в румуньскій части Марамороша, одбыл ся русиньскій фестіваль «Руска Толока». Фестіваль орґанізуваний єст Союзом Підкарпатскых Русинів в Румуніі. Як написали в запрошыню на тогорічну едицию – роблят ону подію для підвысшыня і продолжыня русиньского духа.

Окрем домашніх выконавців, в проґрамі подіі, котра проходила в пленері, выступили артисты з Мукачова і Ужгорода – ансамбль Червена Ружа і солистка – Мирослава Копинец. По артистичній успішній части, ансамбль Червена Ружа, котрий творят тепер Ольга Прокопова і Лілия Немеш, дістал пропозицию награти свою другу платню в «Студию-Р» в Сіґеті. Як засвідчат Лілия Немеш, новы награня зъявлят ся іщы того рока, а радийо Лем.фм буде єдным з першых медий, де буде мож іх послухати.

Выдана в 2013 р. перша платня ансамблю – «Червена Ружа”, награна завдякы помочы Михала Лаурука, предсідателя Союзу Підкарпатскых Русинів в Румуніі была великым реалізацийным і артистичным успіхом.