Членьска громада писателів повязана із семінаром

Як вже є звыком, і того року у фебруарі одбуде ся каждорічна стріча членьской громады Сполку русиньскых писателів Словеньска, котра буде повязана із далшым із семінарів карпаторусиністікы, котры пишуть вже свій девятый рік існованя.

Каждорічну стрічу членьской громады писателів орґанізує Сполок русиньскых писателів Словеньска, Академія русиньской културы в Словеньскій републіці і Інштітут русиньского языка і културы Пряшівской універзіты в Пряшові. Громада буде проходити 22-го фебруара 2017-го року в засідалні Consilium maius в просторах Ректорату Пряшівской універзіты на уліці 17-го новембра в Пряшові і зачаток є напланованый на 9.30 год.

По громаді писателів є на 11.00 год. наплановане продовжованя проґраму. Русиньскый інштітут запрошать на 40-ый семінар карпаторусиністікы і презентацію найновшых выдань красной літературы в русиньскім языку. В рамках проґраму семінара буде традічно і лекція. Мґр. Михал Павліч, інтерный докторанд Центра языків і култур народностных меншын – Інштітуту русиньского языка і културы ПУ, буде говорити на тему під назвов Червеный берег Людмилы Шандаловой.

Першый семінар карпаторусиністікы в році, котрый є все повязаный з членьсков громадов писателів, є про шыроку публіку інтерсный і тым, же на нім мож здобыти вшыткы найновшы выданя русиньской літературы, котры вышли в попреднім році. На семінарі суть участны і авторы, котры в рамках автоґраміады свої книжкы участным і підпишуть.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА