Cвітова музыка і лемківска поезия «При джерелах» – фотореляция

Як заявляли сме на портали lem.fm, в днях 15.-18. вересня/септембра 2016 р. одбыл ся в Креници і Бересті Медженародовий Музычний Фестіваль «При джерелах». Його основательом, директором і орґанізатором єст знаний во світі гушляр – др Мариюш Мончак.

Фестівальовы пункты проґраму проходили в парох місцях курортной Крениці – костелі Вознесіня Пресвятой Дівы Мариі, Старым Здройовым Домі і Новым Здройовым Домі, а на єдно пополудне артисты перенесли ся до давной церкви свв. Космы і Даміана в Бересті. Формула концертів была задумана на получыня музыкы найславнійшых світовых композиторів, котра была переплітана лемківском поезийом. В рамках фестівалю, на котрым мож было почути творы Баха, Вєнявского, Бартока, Моцарта, Гайдна, Шопена і другых, выступили лемківскы артисты: Юлия Дошна (15.09, костел Вознесіня Пресвятой Дівы Мариі) з рецитацийом лемківской поезиі і Петро Мурянка (16.09, Старий Здройовий Дім), презентуючий свою творчіст. В наступных днях фестівалю орґанізаторы тіж не забыли на лемківску культуру, вводячы до музычных концертів поезию Володислава Грабана і Богдана Ігоря Антонича. На концертах лемківска поезия переплітала ся зо звуками гушель, акордеону, віолі і фортепіано, чым дополнила стрічы о русиньскій елемент, замірено вказуваний на обшыри, котра давнійше в більшости заселена была Лемками.

Др Мариюш Мончак то гушляр з лемківскыма коренями (його родиче походят з Береста, в котрым тіж одбыл ся єден концерт). Нич выіхал за океан студиювати в Ню Йорку і Монтреали, был учеником выдатного музыка і педаґоґа, Станіслава Гайзера. Як солиста і камералиста выступувал на найбільшых сценах світа. Днес, окрем концертуваня і нагрываня для знаных фоноґрафічных фірм, орґанізує концерты поважной музыкы в Польщы і Канаді.

Просиме до обзераня фотоґалерий з трьох фестівальовых выступів (фото: Петро Басалыґа).

Крениця, 15.09 – костел Вознесіня Пресвятой Дівы Мариі:

Крениця, 16.09 – Старий Здройовий Дім:

Берест, 18.09 – церков свв. Космы і Даміана: