Далшы дві русиньскы села скапчать нова ціклотраса

Будованя новой біціґльовой стежкы в Полонинах, котра іде од села Влыч по село Кривый (Уліч і Уліч-Кривый за старым норматівным означованьом сел) почала. Пряшівскый самосправный край (ПСК) ту выбудує майже штири кілометры ціклотрас, нову ціклолавку і алтанок, і то за 1,64 міліона евр.

Як інформовала у віторок 25-го юла 2023-го року Даша Єленьова, говоркыня ПСК, будованя ціклотрасы Влыч – Кривый є за порядком третій ціклопроєкт за тот рік, котрый ся реалізує в рамках інвестічной акції Poloniny Trail, якый є заміряный на выбудованя 86 км довгой турістічной трасы про біціґлістів.

Ціна проєкту Влыч – Кривый є 1,64 міліона евр, і є фінанцованый посередництвом европскых і державных фінанцій. Пряшівскый самосправный край має сполуучасть в сумі 5 процент.

Про біціґліцтів і пішых турістів

„В марці сьме в Полонинах почали з будованьом, респектівно обновов майже 23-ох кілометрів ціклотрас і днесь передаваме до будованя далшу часть, тот раз в напрямі на Кривый. Выбудуєме ту нову ціклотрасу, котра поведе коло Збойского потока і скапчать села Влыч і Кривый, де находить ся вызначна културно-історічна памятка UNESCO – Ґрекокатолицькый храм святого Михаіла Архістратига,“ інформовав председа ПСК Мілан Маєрьскый.

Як далше продовжовав, на новій трасі збудує ся і алтанок із сервісным ціклостояном, станіцьов на ладованя і найпотребнішов гіґєнічнов базов.

„Буде то комплетный паклик про вшыткых біціґлістів, котры ту завітають, але і про пішых турістів, а в зимнім періоді і про ліжарів, котры переходять трасов Poloniny Trail,“ повів Маєрьскый.

Вызначна інвестічна акція

Проєкт будованя споминаной ціклотрасы надвязує на інвестічны акції в Полонинах, котры ПСК спустив іщі в марці того року.

Конкретно на проєкт обновы веце як 14,4 км довгой ціклотрасы, семох мостів і 54 каналів в части Старина – Руське. Так само на проєкт выбудованя вісем кілометрів новых трас про біціґлістів у напрямі Стащін, так само трьох ціклолавок і двох алтанків, як і реконштруцкії підходу, 11-ох опорных мурів і 21 каналів в цілковій сумі 4,4 міліона евр. Пряшівска жупа планує вшыткы три проєкты докінчіти іщі в тім році.

Проєкт Poloniny Trail належыть меджі найвызначнішы інвестічны акції ПСК в области турістічного руху за остатні рокы.

Має помочі підняти потенціал Полонин і підпорити тутешній турістічный рух. Ідея выбудовати тоту комплексну біціґльову інфраштруктуру вышла з выступів ініціатівы Catching-up Regions, вдяка котрій в окресі Снина до кінця актуалного року проінвестує ся понад 15 міліонів евр.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА