ЛАПіТ «Кычера» продолжат модернізацию свойой сідибы

Як інформує Лемківскій Ансамбль Пісні і Танця «Кычера» зреализуваный был дальшый етап будівляно-ремонтовых прац в його сідибі в Ліґници. Етап тот односит ся головно до даху. Працы фурт іщы тырвают.

Роботы были ведены завдякы субвенциі Міністра Культуры і Нацийональной Спадковины. Зміцнено м.ін. структуру даху, мурувано новы комины та вымінено нп. рынвы. Роботы оцінены сут на 330 тис. зл, з чого аж 325 тис. зл то як раз міністерияльна дотация. Ремонт робит єдна з ліґницкых будівляных фірм.

Припомнийме, што перше завдякы дотациі Міністра Адміністрациі і Цифризациі ансамбль зробил земельны роботы, в тым ізоляцию будинку, поміняны были выгляды і замонтувана істаляция центального огріваня. Інвестор змінил товды частинно водно-каналізацийну і електричну інсталяциі. Товды зрыхтувано тіж два поміщыня на потребы діяльности ансамбльовой бібліотекы.

В дальшых етапах має быти модернізация сходів, будова вінды та адаптация поєдных поміщынь. По ремонті обєкт має служыти на потребы ансамблю, котрый буде мал гын пробы, своі маґазыны та ґардеробу. Сідиба ансамблю має быти так само місцьом, де бы мали проходити вшелеякого рода культурыны подіі. В плянях є оддати выставову салю з невеликом постійном експозицийом та салу, яка буде мала проєкцийно-конференцийну ціль.

Сідиба ЛАПіТ «Кычера» містит ся в понімецкым будинку, де пак містила ся долгы рокы польска школа. Ансамбль сусідує безпосередньо з будинком Стоваришыня Лемків. Обі орґанізациі придбали сідибы од міста під конец 90. років ХХ ст.