Голосник

Де ночувати з шатром вчас вандруваня по Лемковині?

По горах мож вандрувати на вельо способів. Некотры рішают спати в готелях, інчы выберают колибы, а іщы інчы вандруваня з наплечником і ночуваня під хмарами, в шатрі. Лем де тото шатро розложыти?

На Лемковині фунґує пару місц, де мож свобідні розложыти своє шатро, є близко до воды, все палит ся ватра, а часом ночувати мож в розложеных на місци великых шатрах. Тоты місця то студентскы шатровы базы, котрыма опікуют ся студентскы кружкы провідників, якы спілпрацуют з Польскым Туристично-Краєзнавчым Товариством в пару польскых містах. В своій діяльности занимают ся орґанізацийом курсів на студентскых гірскых провідників, провідників райдів і вандрівок та ведіньом гірскых хыжок і літніх шатровых баз.

Што найдеме в базі?

Студентска шатрова база то місце, в котрым не будеме мати електрикы (з бодай єдным вынятком), текучой воды і муруваного будинку, але в більшости найдеме гын:

  • деревяну хыжку або задашыня, значыт серце базы, місце, де находит ся польовый пец та столы. Є то кухня, ідальня і товариска ізба в єдным;
  • джерело воды, бо більшіст баз находит ся близко потока, з котрого вода надає ся до питя, варіня і мытя;
  • спаня, можеме спати в своім шатрі або великым, базовым;
  • базового – є то особа, котра опікує ся шатровым польом, а додатково – найчастійше вельо знат о горах і ся тым знаньом ділит;
  • ватру, як дополніня климату, при котрій мож впечы кобаску та поспівати до пізной ночы.
Де мож ночувати того рока?

Барз популярном, од десяток років, є база в Радоцині. Перед парома днями Студентскій Кружок Гірскых Провідників в Кракові, котрый опікує ся том базом, подал інформацию, што в тым сезоні база в Радоцині не буде одкрыта зо взгляду на ситуацию звязану з пошырюваньом ся коронавіруса. Але од 6. липця/юлия діяла буде шатрова база в Реґєтові, котром занимат ся Студентскій Кружок Бескідскых Провідників в Варшаві, a од 28. червця/юнія база з Завадці Рыманівскій, што єст під опіком люблиньского кружка.

Ден скорше, бо 27. червця/юнія, сезон одкрыют в базах в Зындрановій і Вислочку, котрыма опікує ся Студентскій Кружок Бескідскых Провідників в Ряшові. Што цікаве, послідня база – база в Вислочку, є дост особлива, бо найдеме гын сауну і джакузі. Поле находит ся над потоком Вислочок, в самій середниі ліса.

З рішыньом, жебы не одкрывати в тым сезоні свойой базы Мушына-Злоцкє, вышол Студентскій Кружок Бескідскых Провідників в Лодзи.

В більшости выміненых місц обовязує скорша резервация місц (майльова або телефонічна). Особливі тепер, в періоді епідеміі.

Фот. База в Реґєтові

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі