Ден в Кривій з лемківскыма акцентами

В Кривій – русиньскым селі середньой Лемковины, 28. серпня/авґуста т.р. обуде ся подія пн. Ден в Кривій. Є то уж чергова едиция імпрезы, котра шторік проходит початком, або кінцьом місяця серпня/авґуста.

В тым році орґанізатор, якым являт ся Стоваришыня Розвитку Шолтыства в Кривій, пропонує охочым м.ін. пленерову потупайку, котра пройде в ритмах традицийной музыкы. На баницкій луці, на котрій розложена буде і камеральна сцена, заграют Манюха Біконт, Михал Мазяж та гості. Попри тым, в проґрамі заплянувано презентацию двох фільмів, котры оповідают історию села та представляют його жытелів. Аматорскы фільмы были награны через наймолодшых в рамках вакацийных фільмовых варшатів.

Орґанізаторы не забыли і на лемківскы акценты. Вчас подіі буде мож коштувати лемківскых страв, котрых приготовліня вчыли ся діти вєдно з опікунами на кулінарных варштатах. Дальше одбуде ся деґустация сельскых хлібів, ватрочка і забавы для діти.

Подія Ден в Кривій буде проходила попри «Гостинци Баниця», на граници неістнуючого села Баниця – Крива. Імпреза є підсумуваньом проєкту Кольоровы істориі, котрий є реалізуваний з фінансовом підпором Малопольского Воєвідства.

До Кривой вартат прити не лем за реченом подійом. В селі находит ся забыткова деревяна грекокатолицка церков свв. Космы і Даміана, котрой будова зачала ся в 1924 році. Єй архітектонічний стиль являт ся інчым од традицийного лемківского. Храм припоминат модель староруской церкви (подібну мож видіти м.ін. в Бортным), котра стоіт на місци попередніх. Внутрі находят ся два бічны олтарі з кінця ХIX ст. Попри церкви стоіт деревяна дзвінниця.