Дестилят - DESTILÁT [MUZIČKA] - lem.fm - Радийо Руской Бурсы

Музычка сама про себе – з радістю граме і на жыво. Вшытко єст можливе – весіля, концерты, балі, фірмовы імпрезы. Де вам треба, там заграме.

Єдна з найліпшых словацкых груп, котра в репертуарі має і русиньскы співанкы, выдала нову платню п.н. “Дестилят” – DESTILÁT [MUZIČKA]. Сут на ній поміщены творы добрі знаны і новы, котрых іщы не мож было почути. Найдете там і шумны русиньскы співанкы. Платню мож си объєднати на сайті ґрупы – за мотузком.

Ансамбль Музычка часто грат в Польщы. Мож было іх слухати того рока в Кракові, на початку липця. Ансамбль был оснований в Братиславі, в 1990 році, пятьома студентами. Скоро стали ся єдныма з найвызначнійшых выконавців фольковой музыкы в своій державі. Од початку пропаґували музыку з ріжных реґіонів Словациі, лем старали ся з пошаном для традициі, оддати єй первістны, стародавны звукы. Ґрупа має тіж в репертуарі музыку Русинів з Пряшівщыны, як і музыку давных русиньскых сел зо середньой части Словациі, з вышнього Погроня.

“Кым сме? Мы ентузиясты традицийной словацкой музыкы. Стараме ся як найліпше грати – для публикы, камаратів і свойой приємности. Музыка родила ся столітями, товаришыла все штоденным емоцийам. Од кстин до похорону – то простір, в котрым возникала, описувала найглубшы людскы страпліня і радости. Стараме ся сохранити єй духа, граючы з полным заанґажуваньом до танця і до слуханя, віриме в тото, же то спосіб, жебы така музыка перетырвала”.

Окрем музыкы, ансамбль Музычка орґанізує вчыня традицийных танців. Більше про ансамбль і його музыку найдете на сайті, де поміщены сут некотры іх выконаня.