«Дідичне Никыфора – Штефан Телеп, лемківскій маляр зо Ждыні»

В минулу пятницю, 21. жолтня/октобра 2016 р., в само полудне, в Музею Никыфора в Креници (одділіня Округового Музею в Новым Санчы) проходил вернісаж выставы пн. «Дідичне Никыфора – Штефан Телеп, лемківскій маляр зо Ждыні». Присутны были м.ін. директор Округового Музею в Новым Санчы Роберт Сьлюсарек, бургомайстер Крениці др Дариюш Ресько. Музычну оправу вернісажу дополнил лемківскій ансамбль Надія з Крениці, а Петро Мурянка, знаний – не лем в Креници – артиста,  бесідувал о артистичным потенциялі Лемків.

Штефан Телеп єст найбарже знаным в Польщы сучасным лемківскым непрофесийным малярьом. Подібні як його попередник – Епифан Дровняк, затримує в малярстві світ сучасной му вітчызны – Лемковины.

Штефан Телеп вродил ся в 1957 р. в Перегримці. В Ждыни замешкал в 80. роках ХХ ст., де зачал разом з женом вести ґаздівку. Од молодости проявлял гуманістичны і артистичны заінтересуваня, м.ін. зберал почтовы значкы, управлял коріньоплястику, прібувал різбити в дереві і фотоґрафувати, знат грати на ріжных інструментах.  Фотоґрафуваня Телепа вяже ся з особом Никыфора. В 1967 р. Е. Дровняк разом з опікуном Марияном Влосіньскым, по дорозі з Фолюша (де Никыфор парократні перебывал в санаториі, де в 1968 р. вмер) затримали ся в Перегримці. Там звиділи церков і были гощены парохом о. Йоаном Левярьом. Там же М. Влосіньскій зробил знимку Никыфора зо священником і парохіянами. Свідком того был 10-літній товды Штефан Телеп. На тот час не знал іщы, хто то Никыфор, але зафасцинувал ся фотоґрафічныма апаратами Влосіньского.

Телеп малює од 90. років минулого столітя. Творит олійныма фарбами на полотні, а в остатнім часі зачал хоснувати акрильовы фарбы. Цілой артистичной штукы, разом з натіганьом полотен на блейтрам, навчыл ся сам. Малювал головні зимом, бо в інчых частях рока все было дашто інче до роботы при ґаздівці. Подібні як Никыфор, записує на образах сучасну му, але і давну – тоту сперед выселінь – Лемковину. Найчастійшы темы його творів то краєвиды Лемковины, в подібній до никыфоровой, жовто-зеленій кольористиці, церкви, представліня святых, лемківскы свята і важны родинны стрічы. Єдным з героів образу єст тіж леґендарний Амроз. Вказує роботу хлопів на ґаздівці, в лісі, лемківскы хыжы, або іх внутрішній вид.

Од рока не малює з огляду на стан здоровля, але свій доробок вказує шыршій публиці на чысленных выставах (м.ін. на лемківскій ватрі в Михалові ци на Бієнале Лемківской Культуры в Креници), на котры фурт єст запрашаний, напр. літом т.р. колекция образів Ш. Телепа вказувана была в Польско-Словацкым Домі ім. Д. Юрковича в Горлицях.

Фотоґрафіі пониже авторства Петра Басалыґы.