В рамках Русиньского Фестівалю во Свиднику, в віторок 24. мая, о 9.00 год. організаторы щыро просят до місцевого Дому Культуры позерати на театральний спектакль про діти пн. «Дівчатко і жебрак».
Сценарий пєсы написала Людмила Шандальова, Спектакль режысерує Даріна Маркова, а акторами будут школярі Основной Артистичной Школы во Свиднику. Як пише авторка – ідея дітячой театральной гры выходит зо стародавной народной приповідкы, а єй головным заміром є вказати, же пыха, як єдна з людскых властивости, є в каждым часі джерелом зла, а наконец і людского нещестя.
Приповідка ся зачынат в ґаздівскій хыжы, де пілсирота, молоде дівча – Ганичка – є выставлена на неперестанне поневераня од мачохы. Каждоденна критика і тяжка робота єй преслідує, но она, выхована в послуху, принимат свою долю покірні аж до часу, коли мачоха докаже такой злости і бездушности, же сироту выжене з дому. Нещестна Ганичка заблудит до ліса, а тот ся єй стане новым домом і даст єй новий смысел жывота. Напомічны будут лісны звірятка, котры єй принимают за свою, зжыє ся з лісом і найде внутрішній спокій. Але на другій страні покій не находит мачоха. Тоту же, пыха і інтриґы доведут до траґічных подій. Вкінци, мачоха з мужом, як жебракы, намагают ся найти одпущыня за своі поступкы і пыху. Як ся іх дорогы зас пeресічут і стрітят ся з Ганичком, мачоха буде выставлена тяжкій пробі покаяня. Пыха є міцно поражена, а любов, як найбільше людскє богатство, переможе.
Сердечні Вас запрашаме в імени авторів і акторів на премєру русиньского театру про діти в спектакли «Дівчатко і жебрак», якій одбуде ся в рамках Русиньского фестівалю 2016 во Свиднику.
Коментарі