Дияментовий ювілей Анны і Адама Барнів
10. лютого/фебруара 2018 р. в Ліґници прошла незвычайна подія. Анна і Адам Барны святкували дияментовий ювілей – 60. річницю супружества.
Пана Адама родом з Чорного Акция Вісла привезла до Хобєні, де початково прожывал і працувал. В околицях Рудной – на Байкові, стрітил шумну дівчыну, Анну Стах, родом з Фльоринкы. Почули, што сут для себе і 9. лютого/фебруара 1958 р. в церкви Воздвиженя Честного Креста Господнього в Рудній звязали ся актом супружества на ціле жытя.
Жытя іх, як і вшыткых Лемків, не было легкє, але завдякы любови, робітности, пошаны для другых, перемагали труды штоденного жытя. 60 років жыли разом як два голубкы, а іх супружество може быти прикладом для інчых. Выховали на честных люди троє діти: Марию, Дороту і Ярослава. Дождали ся тіж парох внуків. Діти і внукы в подяці за жытя рішыли зорґанізувати ім дияментове весіля.
Перше в церкви Воскресіня Христового в Ліґници, по Вечырні, о. прот. Любомир Воргач одправил молебен за здоровля ювілярів при участи церковного хору, дяка Адама і присутных гости.
Пак в парохіяльній світлици зышли ся родина, хористы, запрошены гості і найважнійшы участникы – дияментовы ювіляре Анна і Адам.
Так як все при такій нагоді, зачало ся од желань для ювілярів, вручено ім і квітя та подарункы. Желаня были щыры і часто дост долгы.
Члены церковного хору з о. Любомиром Воргачом і імостю Моніком жычыня заспівали:
Шістдесятлітя
Спільного жытя
Здравля і щестя
Жычыт Вам хір
В тот ден лютовий
В селі Байкові
Присягли собі
Байкову долю
Бо Паньство Барна
То пара гарда
Ту Вам співаме
Іщы більше літ.
Были тіж вершыкы з желанями:
Прожыли сте спільно 60 літ
То єст красний Вашой любови квіт
З нагоды свята Вашого
желаме Вам вшыткого найліпшого
Най вшытко добре, щестя, любов і спокій
Замешкают в Вашій хыжы на долгы рокы
Жебы штоденно сонце Вам світило
А Ваше учутя горяче было
Най діти і внукы Вас кохают
І николи Вашу хыжу не оминяют
Най каждий ден дає Вам дуже радости
І усміх в серцях най гостит
Будте для себе зеренком попрю і щыптом соли
І тым што радує і тым што болит
Будте дале тверды як тот диямент
Жебы на дорозі не заваджал Вам камін
Най смуткы і проблемы Вас оминяют
Во вшыткы парафіяне Вас барз кохают
Най Бог далі возме Вас в опіку
Та разом дожыєте красного віку.
Стріча зачала помаленькы наберати веселого характеру, а гості почули ся як на правдивым весілю і заспівали:
Не будеме пити
Тоту гірку воду
Покля не поцілує
Молодий молоду…
І стало ся, як ся домагали.
Неодолга на сали зъявили ся гудакы – ансамбль 7кропка, зо співом і музыком. Смыка і голосів не жалували. Найвеце было весільных співанок.
Нашол ся тіж час на спомины. Сын ювілятів, Ярослав, задбал, жебы вказати минуле зо жытя родины. Зобрал родинны знимкы, упорядкувал хронолоґічні і запрезентувал тото на малым екрані. Мож было видіти ціле жытя ювілятів та іх діти і внуків, од народин до 90. річниці уродин Пана Адама.
Стріча тырвала до пізного вечера, а єй участникы при музыці і співі розходили ся до своіх домів. Было то істо правдиве весіля по 60. роках… Не бракло і сміху. Так як было то колиси на нашых прекрасных лемківскых весілях.
Текст і знимкы: Ваньо Дзядик
Ґорлиці 106,6 MHz
Łemkowie są…
