Для меншых і більшых – табір в Завадці
Од початку мая 2018 р. тырвают записы на Родинний Табір орґанізуваний в Завадці Рыманівскій. Тыжньова вакацийна школа традициі то нагода на стрічу з тым, што давнійше было чымси природным, а тепер дакус ся о тым забыват.
Хочеме дати нагоду до стрічы поколінь, до стрічы міста зо селом та до стрічы музыкантів, якы вродили ся іщы в 20. роках ХХ ст., з молодым поколіньом, котре глядат інспіраций в традицийній музычній, танцювальній і рукотворній культурі – бесідує Аґата Кравчык, координаторка проєкту Родинний Табір. Пропонуєме спільний тыжден выполнений музычно-танцювальныма і ремісничыма варштатами, прелекциями, занятями, видовисками і забавами при традицийній музыці. Наша оферта направлена є головні на родины. Цілю Родинного Табору є тото, жебы родиче мали нагоду практикувати традицийны танці, ремесло та спів, коли іх діти будут ся добрі бавити і розвивати на занятях – продолжат координаторка.
В попередніх роках мож было м.ін. вчыти ся лемківскых танців, пісен, колысанок, забав, послухати прелекций з істориі і культуры Лемків. Тогорічна едиция є уж пятом і в великій мірі зосередит ся на культурі Погірян. Інавґурация пройде 1. липця/юлия. Заплянувано концерт дзядівскых пісен, традицийных погіряньскых пісен в версиі in crudo, ярмак традициі – народных інструментів, забавок, выробів ручной роботы, реґіональной кухні. В оферті дальшых таборовых дни находят ся м.ін. музычно-руховы забавы при музыці нажыво, варштаты з традицийныма інструментами (ліра корбова, гушлі, басы), занятя вырабляня глиняных горців, фільцуваня волны, лекциі про пчолы, зіля і інче. Фінал заплянувано на 6. липця/юлия. Запрезентуваны будут вшыткы артефакты зроблены вчас варштатів, выступит таборова капеля, буде і забава з гуляньом, на котрій заграют Гудакы, Карузеля, Вітольд Рой Залевскі та Ян Маліш.
Хочеме, жебы ціла родина, вшыткы разом пережыли штоси красне. Каждий найде гев штоси для ся. Помічна буде локалізация – село з ориґінальном лемківском архітектуром і чудовы бескідскы краєвиды – дополнят Аґата Кравчык.
Охоту участи мож зголошувати до кінця мая. Табір тырват од 1. до 6. липця/юлия. Про дрібниці зазерайте гев. Орґанізатором табору є Стоваришыня Капратка.
