Кінцьом січня, реаґуючы на великє чысло звідань од слухачів, офіцияльном дорогом (смотрте за тым мотузком) попросили сме лідерів лемківскых орґанізаций, жебы однесли ся до выповіди Штефана Гладика на XLI засіданю Спільной Комісиі Уряду та Нацийональных і Етнічных Меншын, котрий бесідувал там, же репрезентує 9 “…актывных лемківскых орґанізаций, о великым засягу свойой діяльности, репрезентатывных.” (чытайте і слухайте за тым мотузком). Ставляючы перед собом ціль – выявити слухачам тоту ситуацию в ретельний, провірений і транспарентний спосіб, підсумуєме ефекты нашого дошдліджыня.
Хоц неофіцийныма каналами дішли сме, котры то орґанізациі, та до теперішньой хвилі такой вшыткы лідеры реченых лемківскых орґанізаций замолчали. Не одберают телефонів. Не одписиют на кореспондецию, або бесідуют – “нихто до нас не писал”. Хоц маме ХХІ столітя, до некотрых не дотерли сме ани через е-майль, ани через телефон, ани через смс. Інакше. Дотерти – дотерли сме. Але одбиваючы ся – як од запертой муруваной брамы.
Не будеме Вас долше в нервах тримати і в днешнім Языковым Гокусі Покусі выявиме таємне чысло “9”.
Чом звідуєме акуратні в языковій авдициі? Зато, же в великій мірі справа тыкат ся величезной обшыри лемківской достоменности – ЯЗЫКА. Кєд дахто ся іщы не додумал – ЛЕМКІВСКОГО ЯЗЫКА!
А жебы Вас бодай лем кус заохотити до слуханя – в проґрамі спрібуєме одречы м.ін. на звіданя: чом деякы учытелі лемківского языка, беручы за вчыня грошы, не хотят дати заробити інчым?
Буде тіж несподіванка.
Слухайте Языковий Гокус Покус днес о 20.00 год. Лем в радию Лем.фм.
Коментарі