Днес – за новым стильом – початок Филипівкы

Днес, 15. листопада, православны і грекокатоликы, ідучы за новым стильом, зачали різдвяний піст (Филипів піст, або найшырше серед Русинів популярна назва – Филипівка), котрий все свій початок мат ден по празднику св. апостола Филипа і тырват 40 дни – споминаючы Мойсея, котрий, перед отриманьом Божых заповіди на синайскій горі, постил 40 дни. Филипівка кінчыт ся 24. грудня, ден до великого праздника Різдва Христового, коли выпадат Велия.

Филипів піст, котрого записаны свідоцтва сігают IV столітя, тырвал спочатку 7 і більше дни (залежні од реґіону). Од локального собору в 1166 р., за часів константинопольского патріархы Лукы, Филипівка тырват сорок дни, як і Великій піст.

Різдвяний піст для православных і грекокатолицкых вірных, котры хоснуют юлияньскій календар (тзв. старий стиль), зачынат ся 28. листопада (15. листопада за ст. стильом), а кінчыт – 6. січня (24. грудня).