Митрополіта Йона меджі віруючіма в Канаді

Од неділі 8-го юна до четверьга 18-го юна 2026-го року пряшівскый архієпіскоп і митрополіта Йона Максим быв на душпастырьскій навщіві в Канаді. На запрошіня владыкы Курта Бурнетта, єпархіалного єпіскопа Пассаіку (США), котрый є єдночасно і апостольскым адміністратором Екзархату свв. Кіріла і Методія в Торонті, митрополіта навщівив вшыткы чотыри парохії екзархату.

Як інформовав Інформачный центер Пряшівской архієпархії, вынятковов подійов почас навщівы была торжественна архієрейска літурґія в Катедралнім соборі Рождества Пресявтой Богородіці в Торонті. Головным служытельом быв Преосвященый владыка Курт, котрый Высокопреосвященого Йону такой на початку привітав на теріторії екзархату, і высловив вдячность за прияте позваня.

Кір Йона уділив почас літурґії званя митрофорного протоєрея отцьови Марекови Новіцькому, котрый є парохом катедралы в Торонті. Отець Новіцькый є священиком Пряшівской єпархії, якый од 2012-го року служыть протосінкелом екзархату і парохом в Торонті. На пропозіцію містных віруючіх і жадость владыкы Курта му владыка уділив тітул митрофорного поротоєрея за його жертвенну службу про містну церьков.

Перед одходом до Канады отець Новіцькый служыв у Юсковій Волі, Ольшавіці, а пізніше быв особным секретатьом архієпіскопа Йоана Бабяка в Пряшові.

Владыка Йона навщівив і парохію в Гамілтоні, де ся молив перед копійов Іконы Пресвятой Богородіці з Клокочова.

В неділю 14-го юна кір Йона быв владыка на навщіві парохії Віндсор. В Храмі святого Михаіла Архістратига служыв архієрейску літурґію за участи містной комуніты, як і віруючіх Мелкітьской ґрекокатолицькой церькви в Канаді. В пополідняйшых годинах владыка навщівив і мелкітьскый Храм святого Сімеона Стовпника, в котрім находить ся Ікона Матери Божой – Невычерьпна Чаша. Тота ікона перед двома роками стала міроточівов.

Владыка Йона завершыв свою навщіву Канады меджі віруючіма парохії Ошава. У віторок 16-го юна вєдно із містным парохом і віруючіма помолили ся в пополідняйшых годинах вечурню.

Першы ґрекокатолици із теріторії днешньой выходной Словакії пришли до Канады на переломі 19-го і 20-го столітя. У 1980-ім році выникла Єпархія свв. Кіріла і Медтодія в Торонті, котра была записана як єпархія словацька.

По реорґанізації у 2022-ім році была тота церьковна штруктура підпорядкована під юрідікцію русиньской Піттсбурзьской митрополії. В храмах екзархату служыть ся доднесь по церьковнославяньскы і по словацькы.