До Балутянкы вернул церковний дзвін

До села Балутянка на східній Лемковині вернул церковний дзвін, котрий остал одтамале вывезений рівно 70 років тому.

Село Балутянка такой ціле в 1945 році было переселене на Радяньску Украіну. Русины з Лемковины, котры надіяли ся іти до ліпшого світа, часто заберали зо собом утенсилиі і выпосажыня храмів. Жебы забезпечыти масывны дзвоны – закопували іх з надійом на тото, же село іщы колиси оджыє, або просто брали на Совітску Украіну.

Остатнім часом балутяньска церков Успіня Пресвятой Богородиці з ХVII ст., в котрій по великых ремонтах повело ся поправити конструкцию храму та одреставрувати забытковий іконостас, одзыскала наступны ориґинальны елементы. Довершыньом ідеі ратуваня оной церкви было верніня в листопаді/новембрі 2015 р. церковного дзвону, котрий был вывезений в 1945 р. на Украіну і долгы рокы находил ся в селі Старе Місто, Підгаєцкого району на Тернопільщыні. Дзвін на своє властиве місце, при помочы добрых люди, привернул п. Ярослав Одрехівскій.

Балутянка была основана в 1470 р. Од XIX в. властителями села были Станислав і Анна Потоцкы. Село было колыском різбы, а од 1878 р. в поблизкым Рыманові была отворeна школа різбы, в котрій вчыло ся вельох жытелів Балутянкы. Різбярскы традициі втримали ся до днес. В серпни 2013 році в селі проходило торжество, звязане з закінчыньом ремонтовых робіт храму пн. Слідами лемківской культуры. Товды же одслужено екуменічне богослужыня, одбыли ся прелекциі на тему істориі села та загоріла ватрочка, при котрій мали змогу стрітити ся бывшы жытелі села.