До купліня Варголь, Бенксі і інчы

Неодолга кінчыт ся інтернетова продаж авкцийного дому Morgan O’Driscoll Irish and International. Обнимат творы парудесятьох артистів, в тым Енді Варголя. Хоц серед мас ліпше знаный з образів з баньками поливкы, то є він тіж автором серіґрафік десятьох знаных спортовців. Сесы роботы тіж уж видят ся славныма.

Авкция закінчыт ся 27. жолтня/октобра тр. В портфоліо короля поп-арту, што мож выліцитувати, сут 4 серіґрафікы Михамедда Алі, підписаны і пономеруваны 8, з едициі 150, котры выдрукувал Руперт Ясен Сміт в Ню Йорку в 1978 році. Кажда є окремо обрамувана. Естимувана ціна то 200 000 €–300 000 €.

Вродженый як Кассіус Марселлюс Клей, боксер, активіста і філянтроп змінил назвиско на Михамедд Алі і принял іслям в 1964 році. Принимат ся го за єдну з найбарже значучых і славных осіб ХХ ст., а тіж єдного з найліпшых боксерів в істориі.

Варгольови, котрый был передовом постатю розвитку візуальных штук і котрого ґазета «The Economist» окрислила в 2009 році лідером рынку штукы, не были незнаны бойовы штукы. Тренувал тяжку атлетику, реґулярні ходил до спортовых центрів.

Другій Варголь до купліня то «Монашка од Інґрід Берґман», выдрукувана так само Рупертом Ясеном Смітом в Ню Йорку. Серіґрафіку з 1983 рока выцінят ся на 25 000 €–35 000 €. На днес дают за ню 16 000 €, а до кінця остало іщы 8 днів.

До выліцитваня сут тіж «Глуптакы» од Бенксі. На тепер дают за него 21 000 €, а сподівана ціна то максимальні 30 000 €. Вартіст творів того стріт-артового артисты фурт росне, одколи образ вказуючый його вид на Ізбу Ґмін бритийского парляменту продали минулого рока за 11,1 млн евро.