До Лося на великодній ярмак

Мазярска Загорода в Лоси, яка є одділіньом ґорлицкого Музею Дворы Карвациянів і Ґладышів, рік-річні орґанізує цикль подій, котры або сут повязаны з професийом мазярів і стисло пропаґуют лосянів, або односят ся до традиций, звыків і просто поєдных подій, котры мают як ціль промоцию ґорлицкого реґіону. Єдном з подій, котра од долшого часу вписала ся в канон імпрез, орґанізуваных одділіньом Музею в Лоси, є шторічний Лемківско-Погіряньскій Великодній Ярмак, котрий того рока одбуде ся 2. квітня/апріля.

В тогорічным проґрамі, котрий буде проходил в забудові загороды, од 11.00 год. буде выставлюваний ярмак ремесла і рукоділа. В меджечасі будут тырвати великодні варшаты для діти і дорослых, а в рамках іх буде мож спрібувати робити погіряньскы пальмы ци заняти ся крашыньом лемківскых писанок (іде о взір типовий для Лемковины). Подібні як влони, од 13.30 год. зачне ся полюваня на яйця – 800 яєц до позбераня (забава для діти до 12 років), a піл годины перше одбуде ся турнір битя яєц.

Жебы взяти участ в ярмаку як выставця, треба ся наперед зголосити до орґанізаторів.