До Полонин мають іти міліоны на розвиток

Міністерство жывотного оточіня Словацькой републікы просадило реалізацію плану розвитку на Мураньскій полонині, котрый поможе реґіону при його трансформації. На пілотны проєкты розвитку мягкого турізму в Народнім парку Мураньска полонина, але і в Народнім парку Полониным, котрый є в русиньскім реґіоні, має іти 16 міліонів евр.

На стрічі з представителями самосправ, турістічного руху і Лісів Словацькой републікы о тім в пятніцю 7-го мая інформовав державный секретарь резорту жывотного оточіня Михал Кіча. Інформовала о тім аґентура TASR.

Мають ся творити робочі місця

„Проєкты розвитку будуть заміряны на вытворіня робочіх місць, передовшыткым в секторі природного турізму, природі близкого обгосподарьованя ліса і повязаных з тым діялностей,“ повів Кіча. Фінанції мають іти до тых двох народных парків з плану обновы в рамках кроків на адаптацію реґіонів на зміну клімату.

В плані розвитку є пріорітов мягкый турізм, тот має подля енвірорезорту высшу придану вартость і представлює софістікованішый і діверзіфікованішый сектор як інтензівне здобываня дерева, што може помочі сельскым реґіонам заборонити вылюдньованю.

„Одкрываме комунікацію о можливых подобах підпоры в слідуючіх роках так, жебы фінанчны средства ішли до сістематічных і тырвало утримательных змін в охрані природы, до підпоры містной подникательской сферы і інфраштруктуры про навщівників реґіону,“ повів Кіча.

Секретарь быв і в Стащіні

По пятніцьовій стрічі в Тисовці Михал Кіча одышов до Стащіна, де бісідовав і будучности Народного парку Полонины. На стрічі брали участь представителі самосправы, жупы, Лісів Словацькой републікы, пріватных маїтелів лісів, мімовладных орґанізацій і турістічного руху.

Резултатом стрічі в Стащіні є договор на далшім поступі при творіню выберовой комісії. Тоту будуть творити представителі сел з цільом найти рішіня на підпору турізму в реґіоні.

Державный секретарь собі в Стащіні припомянув і жертвы Другой світовой войны а навщівив і новозрядженый сельскый музей, котрый захоплює історію села включно войновых дій.

Жрідло фотоґрафії: Štátna ochrana prírody Slovenskej republiky.