Доповід проф. Владиміра Осадчого

Ближыт ся чергова річниця віче во Фльоринці, будучого початком Руской Народной Республикы Лемків. На памятку той подіі 5. грдуня/децембра установлено як Ден Русина в Польщы. З той нагоды Стоваришыня Руска Бурса і Стоваришыня Лемків просят на спільне торжествуваня.

Тогорічна едиция Дня Русина заплянувана на ден 2. грудня/децембра і проходила буде в Рускій Бурсі в Ґорлицях. Головном частю святочного проґраму буде доповід проф. Владиміра Осадчого пн. Призабыта Русь. Прелеґент єст автором медже інчыма книгы Свята Русь. Розвиток і влияня ідеі православя в Галициі, a тіж десятків дописів і інчых книжковых публикаций з обшыри істориі Костела, односин медже віроісповіданями та істориі полудньово-середньой Европы ХІХ і ХХ ст. Проф. Осадчий актуальні працує на Любельскым Католицкым Університеті, в Державній Высшій Професийній Школі в Холмі. Єст м.ін. директором Осередка Східньоевропейскых Досліджынь – Центру Украінікум Люблиньского Католицкого Університету. Занимат тіж становиско полномічного люблиньского воєводы П. Чарнека до справ спілпрацы з Украіном.

Дале, в 100. річницю ліквідациі лаґру в Талергофі, заплянувано в проґрамі Дня Русина презентацию талергофскых памяток і проєкцию фільму Маріі Сільвестрі і Джона Ріґеті пн. Перемінены через Талергоф. То документ о першым в Европі концтаборі. Згынули в ним, та в наслідстві вязніня гын, десяткы представників русиньской інтеліґенциі.

Початок подіі заплянувано на 15.00 год.