Дякованя за уроджай з русиньскым проґрамом

На неділю 22-го октобра місто Стара Любовня вєдно із Любовняньскым освітнім центром і Словацьков земледільсков коморов приговляють подію в рамках котрой ся буде дяковати за уроджай. Подія під назвов Подякованя за дары Земли зачінать о 10.00 год. в просторах любовнянськой шпортовой галы.

Окрім выставкы і дяковной Божественной літурґії, котру одслужыть в просторах галы ґрекокатолицькый священик, в рамках події буде мож видіти і богатый културный проґрам. Векшыну із нього творять русиньскы ансамблі ці соловы інтерпреты.

В рамках културного проґраму буде мож в Старій Любовні в неділю видіти Наталію Кучову Сікорякову, Шамбрінців, Барвінок, Удолчанку, Кечеру ці Народну музику Замішковців, но і далшых. Проґрам буде модераторскы проводити так само знама інтерпретка русиньской народной співанкы – Маріяна Железна. Вступ на подію є бесплатный.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА