Был єдным з найважнійшых американьскых композиторів ХХ ст. Называно го корольом джазу, бо то він довюл до того, што тот жанр на добре загостил в концертовых салях і в фільгармоніях.
До найважшнійшых творів Джорджа Ґершвіна причыслят ся симфонічны поемы «Американин в Парижы» та «Рапсодія в стилю блюз», оперу «Порґі та Бесс» та вельо співанковых стандардів. Николи ся не оженил. Вмер на рака мозґу, маючы лем 39 років.
Коли в половині 20. років ХХ ст. Ґершвін приіхал до Парижа, хотіл намовити пару знаменитых особливости тамтышньой музичной сцену, жебы здрадили му штуку композициі. Надя Буланже та Моріс Равель повіли му, што є він на тілько добрым композитором, же не мусит ся од них ничого вчыти. Ігор Стравиньскій спостерюг, же при тым, кілько Ґершвін зараблят, то винен студиювати в Американина.
В своіх часах был Ґершвін суперзвіздом, а славы посмакувал уж на 22 рокы. Нутовый запис до співанкы «Swanee», котру награл вокалиста Єль Джольсон, продал ся в мілийоновым тиражы, а сама платня – в дальшых двох мілийонах, што зробило з Ґершвіна богача. «Swanee» скомпонувал в 10 минут, коли іхал автобусом по Мангатані…
Джордж Ґершвін хотіл быти ціненым композитором клясичной музикы, ціль осягнул, революцийонізуючы при нагоді тоту музику. Получыл єй з народныма елементами, але і з джазом, котрый чути в єдній з його найбарже знаных композиций, симпофічній поемі «Рапсодія в стилю блюз». Тот джазовый концерт на оркєстру вызвучыт як першый в днешнім проґрамі, буде тіж дакус інчой його клясикы, тіж клясикы інчых клясиків.
Слухайте творчости Ґершвіна днес од 20.00 год.
Коментарі