13. січня/януара тр. в Радоцині прошла стріча, головном темом котрой были інвестицийны пляны звязаны з дальшом будовом Екопарку Радоцина.
На стрічы, якой орґанізатором был Надлісничый Надлісництва Ґорлиці Юзеф Леґутко, присутны были м.ін. локальны власти: Ґорлицкій Староста Мария Ґубала і Війт Ґміны Санкова Малґожата Малух, представникы дальшых Надлісництв, члены Заряду Округу Ліґі Охороны Природы Тадеуш Оґожалек і Ґражына Кужава, директор І Загальноосвітного Ліцею ім. Марціна Кромера в Ґорлицях Ян Дрождж та Маґдалена Семля-Кужава – учытелька і опікунка разом, з ґрупом школярів лавреатів загальнопольского еколоґічного конкурсу Екогероі.
В першій части Юзеф Леґутко, Надлісничый Надлісництва Ґорлиці, омовил темы звязаны з роботом лісовых робітників і зрівноваженом лісовом господарком, на котрій, подля його слів, основане єст фунґуваня Державных Лісів. Представил так само інвестицийны роботы звязаны з розбудовом Екопарку Радоцина (едукацийны стежкы, рекреацийно-выпочынкова част, конференцийна саля).
В другій части стрічы лавреаты загальнопольского еколоґічного конкурсу Екогероі, школярі І Загальноосвітного Ліцею ім. Марціна Кромера в Ґорлицях, представили свій успішный екопроєкт пн. «Ід за слідом».
Підсумуваньом стрічы были короткы выповіди запрошеных гостів тыкаючы дальшой спілпрацы в обшыри еколоґічной едукациі в Екопарку. Має то быти місце зосереджаюче науковы середовиска, стоваришыня, студентів і учеників в обшыри шыроко понятой едукациі пропаґуючой природничы, культуровы і історичны ресусры нашого реґіону.
В рамках Екопарку перебудуют господарчый будинок на модерный і конференцийно-выставенничый обєкт, будинок бывшой аґреаторні заадаптуют на мультімедияльный інформацийный будинок. За ріком зроблят едукацийно-інтеґрацийну зону з будинком в виді лемківской хыжы – будут в ним промувати дерево і способы його хоснуваня як еколоґічного будівляного джерела. В плянах є іщы інтерактивный парк з едукацийном функцийом з чысленныма темовыма стежками і атракциями для наймолодшых.
Ціліст має быти скінчена в 2023 році.
Фот. gorlice.krakow.lasy.gov.pl
Повязаны дописы
Ґорлиці 106,6 MHz
Łemkowie są…
