Голосник

Енніо Морріконе, «З повагом», просит Павел Малецкій – неділя, 20.00 год.

Енніо Морріконе, знаный композитор і дириґент, вмер в середу, 7. липця/юлия 2020 р., маючы 91 років. Його приятель в бесіді з журналистами повіл, што был він барз віруючым чловеком, але думал над тым, ци в небі заприязнити ся з Бетховеном ци Моцартом.

Енніо Морріконе был «чудовом дітином». Першы композициі створил на шіст років. Коли мал 12, його родиче записали го до римской музичной консерваториі – Академіі св. Цецилиі. Штырьолітній проґрам вчыня Енніо зробил в нецілы два і оставил учельню як єден з єй найліпшых студентів.

Через пару років Морріконе зараблял на жытя граючы на трубці в нічных клюбах, але уж в половині 50. років зачал спілпрацувати з італияньском телевізийом RAI. В 1961 році написал музику до образу «Фашыста», дебютуючы як фільмовый композитор. Од половины 60. років зачал спілпрацувати з Серджо Леоне – італияньскым режысером і сценаристом, компонувал для него музику до тзв. спагетті-вестернів. Пак пришла спілпраца з чысленныма фільмовыма творцями. Разом скомпонувал або спілтворил музику до веце як 500 фільмів.

В 2007 році Фільмова Академія признала му почестну нагороду Специяльного Оскара, а в 2016 році достал Оскара за звукову стежку до «Ненавистой Осемкы» Квентіна Тарантіно.

В проґрамі почуєте його найбарже знаны фільмовы композициі.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі