«Слідами Никыфора» – конец выставы

Од 14. квітня/апріля 2018 р. мож в Музею Никыфора в Креници видіти выставу пн. «Слідами Никыфора», яка орґанізувана є з нагоды 30. річниці діяльности Креницкого Стоваришыня Творців Ґалерия «Під Каштаном», занимаючого ся промоцийом культуры в реґіоні.

Орґанізаторами ювілейной выставы сут Округовий Музей в Новым Санчы, одділіньом якого єст Музей Никыфора, та Ґалерия «Під Каштаном». На выставі презентуваны сут творы креницкых артистів, інспіруваны жытьом та творчістю Епифана Дровняка. Роботы были зрыхтуваны в памят 50. річниці смерти артисты (Никыфор Креницкій вмер 10. жолтня/октобра 1968 р. в Фолюшы).

Стоваришыня Творців Ґалерия «Під Каштаном» основане было в 1988 р. Основательком і долгорічном його ведучом была Ґражыня Петришак. Орґанізация зосереджат малярів, фотоґрафіків, різбярів з Креници і околиц. Цілю діяльности є м.ін. пошырювати реґіональну культуру та орґанізувати выставы і авторскы стрічы. В 2003 р. отримало оно од новосандецкого старосты Золоте Сандецкє Ябко, а в 2008 р. Міністер Культуры і Нацийональной Спадковины передал стоваришыню ордер «Заслужений про Польску Культуру».