Голосник

ЄМ ПАМЯТЮ. Пару сценічных ескізів про Лемків – спектакль в Ґорлицях

16. 8. 2020, Ґорлицкій Центр Культуры, Gorlice

16. серпня/авґуста о 19.00 год. в Ґорлицкым Центрі Культуры одбудe ся показ спектаклю:
ЄМ ПАМЯТЮ. Пару сценічных ескізів про Лемків

Єдна з лемківскых леґенд бесідує історию «сплячого» войска. Подібно ціла амрія в полным зброіню разом з оружоносцями і кінми спит в підземлях замку на Горі Святой Ядвіґы. Лемкы, будучы єдном зо штырьох вызнаных етнічных меншын в Польщы, сут фурт в загальній свідомости так само таємничы, як тото спляче войско з леґенды. Вельо в тым вины выселенчых акций, котры мали довести до затрачыня іхньой культуровой достоменности звязаной з обшырю, на котрій прожывали. Спектакль ЄМ ПАМЯТЮ є експедицийом в глубину іх істориі, експедицийом до середины маґічного світа лемківскых леґенд і звыків, поворотом до часу, коли кажда гора і каждый камін бесідували свою історию, а праві за каждом з тых історий ховали ся страшыло ци дух.

Пєсу зрыхтувано нa пограничы артистичных та соспільных діянь, анґажуючы професийных театральных творців і місцевых люди. В проєкті участ берут професийны артисты та жытелі Ґорлиц і околиц. Од червця до серпня вшыткы разом досліджали памят, котра тыкала Лемків. В час спільной роботы створили спектакль, якій лучыт елементы драматичного театру, театру танця і мультімедияльного видовиска.

Режысерия і сценоґрафія: Войцєх Фаруґа

Музика: Стів Наш

Выступуют: Якуб Кручек, Кристиян Лысонь, Оскар Мафа, Ніна Мінор, Катажына Павловска та участникы варштатів.

Показ спектаклю пройде 16. серпня/авґуста о 19.00 год. в театральній сали Ґорлицкого Центру Культуры. Вхід можливый за вказаньом безплатных білетів доступных до одобраня в секретарияті ҐЦК од вітірка, 11. серпня/авґуста.

Loading Map....