Голосник

Фестіваль церковной музыкы в Гайнівці

В неділю 11. мая того рока концертами хорів з Варшавы і Любліна зачал ся Медженародовий Фестіваль Гайнівскы Дни Церковной Музыкы.

Од середы до пятниці (14-16.V) в гайнівскій церкви будут проходити конкурсовы переслуханя хорів з цілого світа в парох катеґориях, а на суботу (17.V) передвиджене оголошыня лавреатів конкурсу.

Початкы фестівалю то 1981 р., коли был задуманий як колядничий перегляд, але введений в Польщы воєнний стан стримал думкы орґанізаторів, зато перший фестіваль, названий Днями Церковной Музыкы, одбыл ся за благословліньом православного митрополиты Василия в 1982 р. в гайнівскій церкви св. Миколая, а пак перенюс ся до новопобудуваного Собору Св. Тройці, при проєктуваню котрого брал участ і світовой славы артиста лемківского походжыня – проф. Юрий Новосільскій.

Од основаня гайнівского фестівалю вельократно брали в ним участ і Русины (напр. православний парафіяльний хір з Крениці, женьскій хір з Орябины і ін.), а того рока русиньскій акцент то хір РУЗАНОВ з Дурдьова, якій в своім репертуарі має, окрем творів найвыдатнійшых композиторів церковной музыкы, співы карпаторусиньского напіву в обробці Мариі Холошняй і Татияны Барна. Дюрдівскій хір мож буде послухати в пятницю 16. мая.

Більше інформаций за мотузком: www.festiwal.cerkiew.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі