Фестівал UM UM тот рік і о Русинах

В Старій Любовні ся в днях 8-го аж 10-го септембра 2017-го року одбуде вже шестый річник фестівалу UM UM. Фестівал незалежного сучасного уменя тот рік має тему – Русины, Словаци і Стара Любовня.

Як у пресовій справі інформують орґанізаторы фестівалу, од юбілейного пятого річника є фестівал присвяченый темі одношіня Словаків і іншых народностей або етнічных ґруп, котры роками жыли довєдна в тій околіці і вытворюють довєдна історію і културу того реґіону. Тот рік фестівал заміряв ся на Русинів.

Орґанізаторы ся на фестівал приготовльовали цілый рік. Навщівили дакілько фолклорных фестівалів в окресі Стара Любовня, так само на выході Словакії навщівили дакілько деревяных церьквей і монастырів, музеії ці інштітуції. Штудовали тематічну літературу і філмы. Стрітили ся з десятками вызначных людей, з котрых многы прияли запрошіня выступати на тогорічнім фестівалі. Як раз тых людей будуть годны видіти нажыво і участници фестівалу в рамках бісід, промітаня філмів, театралных пєс, музичных вечорів або в рамках вернісажі першого річника вытварного сімпозія, котрый одбуде ся коло фестівалу, і котрый має назву SYMPOSIUM PICTUM.

В проґрамі фестівалу не буде браковати інсценація Гавай, котру має в репертоарі Театер Александра Духновіча в Пряшові, ці філм Осадне. Промітати ся будуть і філмы о Підкарпатьскій Руси.

Фестівал так само як влони принесе і премєру постдраматічной пєсы, котра выникла на мотівы досправдового оповіданя із історії Старой Любовні. Режісерка і головна орґанізаторка фестівалу Марика Смрекова дала довєдна міджінародну ґрупу творців, котрой членове на два тыждні пришли до Старой Любовні, жебы вытворити пєсу з назвов EYEKON(TACT).

„Іншпіраційов на пєсу были православны іконы, котры з давных часів творять часть нелем нашой, але і европской ці світовой културы,“ пише ся у пресовій справі.

Комплетный проґрам фестівалу можете собі посмотрити на плаґаті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА