Фестівалы в юлі на Пряшівщіні

Зачали літні вакації і то час, коли орґанізують ся і різны фестівалы – в тім чіслі і русиньскы. Выбрали сьме про Вас три інтересны події, котры варто навщівити в місяці юл 2016-го р.

Свято Русинів з обох боків Дунайца

Славности културы Лемків – Русинів, або свята Русинів з Польщі і Словакії ся одбудуть в купелях Смерджонка в Червенім Клашторі 9-го юла того року од 11.00 год до пізного вечера.  Ґрекокатолицька літурґія, русиньска кухня і богатый фолклорный проґрам із нашым професіоналным ПУЛС-ом, камюньскым Барвінком, лемківсков Терочков і іншыма колектівами як Удолчанка з Удола, Чірчанка з Чірча, Вінок із Шарішского Ястрабя, Біловежанкы з Біловежы і выступами русиньскых співачок Анны Порачовой і Маріянны Железной і дуа Карашовых – тото вшытко на Вас чекать уж тоту суботу.

Традічны свята в сканзені

17-го юла 2016-го, в неділю по Русиньскій ватрі на Малім Липнику, буде проходити вже традічный фестівал під назвов Славности Русинів під градом. Подія, котру шторік орґанізує Русиньска оброда на СЛовеньску буде і тот рік проходити в любовняньскім сканзені. Проґрам зачінать о 12.30 год. церьковнославяньсков літурґійов з русиньскыма чітанями і проповідьов в деревяній цеьркви в сканзені. По літурґії буде проґрам о 13.30 год. продовжовати выставков фотоґрафій і о 14.00 зачне културный проґрам на амфітеатрі.

Шаріськый і русиньскый фолклор

Русиньска оброда на Словеньску запрашать і на Переглядку русиньского і шаріського фолклору. Подія одбуде ся 24-го юла 2016 од 14.00 год.  в сканзені в Бардейовскых Купелях. У проґрамі выступлять Шарішанці з Пряшова із солістом Любоміром Шімчік, Фолклорный колектів Біловежанка з Біловежы, Мужска співацька ґрупа з Ряшова, Женьска співацька ґрупа зо Златого, Марія і Патрік Шуркаловы з Бехерова, Співацька ґрупа Самы собі з Бардейова, Крістіна і Домініка Фечаніновы зо Снакова, Степанія Ковачова з Ортутовой, Вероніка Данькова з Кружльова, Андреа Фотькова з Кожан, Терезія і Тобіас Черкаловы з Бардейова, Славомір Козак з Бардейова, Елішка Чехова з Бардейова, Тамара Кухтова з Осікова і Леа Козакова з Бардейова. Мoдeраторков проґраму буде Марія Шуркалова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА