Фільм про Шляхтівску Русь – премєра в інтернеті

В найблизшу середу, 12. червця/юнія 2019 р., в сервісі YouTube і сайті продуцента пройде інтернетова премєра документального фільму про Шляхтівску Русь. Документ явит ся на єдным і другым сайті о год. 19.30. Просиме на короткє оповіданя і спомин про найдале на заході положену русиньску енкляву в Польщы.

Фільм єст короткым спомином про історию териториі і населіня Шляхтівской Руси. Продуцентом, а заєдно режысером, сценаристом, чловеком од кадрів і монтажыстом єст Даян Ярослав-Монастырскій. Наголовок образу то просто назва реґіону – Шляхтівска Русь. Єст то рахуючый близко 12 минут фільм, якій за головну ціль має оповісти про долю Русинів з той части Лемковины.

В оповісти стрітиме ся з днешнім резерватом – Білом Водом, якій зорґанізуваный был в 1963 р. на обшыри бывшого, выселеного села Біла Вода. В коротку прогульку по може не все знаній істориі поведе обзераючых пан Бернард Васельскій – працівник місцевой аґротуристикы Громада – Біла Вода, і мале дівча, лемківско-польского походжыня. Обставины зниманя фільму были барз свобідны, о кілько в примірі того рода проєктів мож бесідувати про свобідну роботу. Образ реалізувано вчас родинной прогулькы по Руси, а точнійше по днешнім резерваті. Кадры зо Шляхтівской Руси обогачены сут музиком Юлиі Дошны і ансамблю Серенча.

Автор фільму, Даян Ярослав Монастырскій, сам про себе пише, што він Галичанин. Народил ся в Тернополи на Украіні. Од парох років жыє в Кракові. По професиі театральный режысер, аніматор культуры. Робил як журналиста, любитель Галичыны, гір і спадковины рідной краіны.

Шляхтівска Русь то обшыр штырьох рускых сел: Шляхтовы, Явірок, Білой Воды і Чорной Воды. До переселінь в реченых штырьох місцевостях прожывало бл. 2 тис. Русинів. Більшіст з них під насильстом пропаґанды добровільно переселила ся на совітску Украіну. Пак, частина з них втекла назад. Але і іх стрітила доля вшыткым Лемкам спільна. В 1947 р. войско погнало тых люди на высокы, недоступны, обырвисты горы, в Долину Попраду, на Обідзу, аж до Санча, одкале мали на все піти в незнане.

Днешні жытелі Явірок, што не все стрічане в інчых частях Лемковины, радо споминают на своіх попередників. В центрі місцевости поставлены сут інформацийны таблиці, а на єдній з них мож чытати пару речынь про Лемків. До той поры орґанізуваных было в липци/юлию пару едиций Пєніньского Фестівалю Гірскых Культур Лемків, Руснаків і Ґуралів в Явірках. Через сусідню Шляхтову веде головный пут, якій носит назву ул. Лемківска.

Премєру видіти мож уж в найблизшу середу о 19.00 год. на каналі Ютубе або на сайті продуцента і на порталю ЛЕМ.фм.

https://www.youtube.com/watch?v=yf0p6DNuMIo&fbclid=IwAR19gajzq6BJpPCEc4tzwmu0m9PHaqeEHkkL9Wx3xrQE8s2YwS_mnThZC8w