Гарасимович в Музею Никыфора

В минулу пятницю, 12. лютого/фебруара, в Музею Никыфора в Креници проходила стріча посвячена польскому поеті Юрийови Гарасимовичови під назвом Гарасимович. Kняз поетів в краіні нижности – о поеті під небом Лемків, о котрій заявлали сме гев.

Зобраных привитал Збіґнєв Волянін, кєрівник одділу суачасной, народной та непрофесийной штукы Округового Музею в Новым Санчы, до якого входит і Музей Никыфора. З. Волянін ввюл присутных в тему стрічы – навязал до цілорічного празднуваня ювілею 20-літя істнуваня Музею Никыфора. Єдном з подій празднуваня была выстава під назвом Гарасимович в Никыфора, якой вернісаж проходил осіню минулого рока. Пятницьова стріча была кульмінацийом празднуваного ювілею.

Головным пунктом проґраму была прелекция др Алана Вайса з Вроцлавского Університету про меньше знану творчіст Юрия Гарасимовича.

Пак, з артистыном частю выступила молодіж з мушыньского ліцею, яка презентувала выбраны вершы поеты.

Вчас осіннього вернісажу выставы Гарасимович в Никыфора присутний был м.ін. лемківскій поета Петро Мурянка, якій оповіл о дружбі Ю. Гарасимовича з родином Трохановскых, частых його одвидинах в Білянці. Тоты візиты і стрічы з людми Гарасимович передал в вершах. Петро Мурянка прочытал тіж свій поетыцкій твір, дедикуваний Юрийови Гарасимовичови. Было то перше публичне выконаня верша. На вернісажы присутна была тіж жена поеты, Мария, яка оповіла вельо інтересуючых і незнаных фактів з часу, коли Гарасимович одвиджал Лемковину, а одвиджал єй часто. Мария Гарасимович вмерла перед двома місяцями, єй то задедикувала свою пісню выступуюча на конец пятницьовой стірчы лемківска піснярка – Юлия Дошна.

Празднуваня ювілею основаня уж закінчене, але Музей уж рыхтує новы выставы і стрічы з цікавима артистами. О двох з них, специяльні для чытачів порталю лем.фм, повіл З. Волянін.