«Гарасимович в Музею Никыфора» – реляция, середа 20.00 год.

Запрашаме днес на реляцию зо стрічы Гарасимович. Kняз поетів в краіні нижности, яка проходила в минулу пятницю, 12. лютого/фебруара, в креницкым Музею Никыфора. Почуєте в ней прелекцию др Алана Вайса з Вроцлавского Університету про творчіст Юрия Гарасимовича.

Буде то выклад о поеті в контексті Никыфора, Лемків та Лемковины, до котрой тот творця часто ся односил і о котрій писал вельо років.

Явил ся Гарасимович на Лемковині неодолга по выселінях, в 1949 році, коли приіхал на практыкы до технікум в Мушыні. Зачал ходити по горах і тото што виділ, міцно на него влинуло. Хоц спочатку писал, здавало ся, же лем краєвидовы вершы, критикы виділи в них уж дашто більше і о тым більше буде в днешній прелекциі. Окрем того, Збіґнєв Волянін, куратор Музею Никыфора, оповіст про празднуваня ювілею 20-літя той інституциі, про жену Гарасимовича та про вывставово-выдавничы пляны Музею на будуче. Почуєте тіж поезию Гарасимовича і лемківску піснярку Юлию Дошну, співаючу в чест памяти о жені Гарасимовича – Мариі.