Голос зза горы – «Говорить Пряшів» – пятниця, 20.00 год.

Кєд жыєте в селі при саміцькій граници, так товды мож повісти, што «Говорить Пряшів» то досправды голос зза горы. Но лем, коли Ваше село барже на пілнічній Лемковині, товды нон голос зза горы буде сильном метафором.

Студенты зачали вкінци науку. Все, коли-м был дітваком, боліло ня, же школяре до школы ідут уж в вересни, а тоты, што за вельо ся не вчат, а веце імпрезуют – аж за округлий місяц. В Пряшові маме свою школу, університет. Мож гын вывчыти наш русиньскій язык. Не так давно могли з такого корыстати нашы Лемкы в Кракові, але ся скінчыло. Не судиме і не глядаме одповіди на звіданя «чом?».

Хто глядат наукы, так го просиме до Книжници.фм, де почути буде мож «Моі стишкы» Миколая Коневала. В Припоминці Теодозия Латтова оповіст про «Добрий ден». Так майте шумний, добрий ден. І іщы днес, а пак і заран. І так ден за ден.