Google Arts&Culture

Google Arts&Culture – новий он-ляйновий сервіс та смартфонова аплікация дозваляют мати віртуальний приступ ґу збірковым фондам, музейным колекциям і основным інформациям про артистів цілого світа.

Тоту новинку одкрыл Google Cultural Institute. Завдякы аплікациі легко можеме найти нас інтересуючы творы, котры мают в колекциях музеі зо 70 держав, з котрыма інститут спілпрацує.

Єст можливых вельо способів гляданя інформаций. Єден з найпростійшых способів такій, што глядаме си інтересуючого нас русиньского артисты прим. Енди Варголь і дознати ся більше про його жытя і творчіст. Мож досліджати самому артистичны творы подля епох, мотивів ци кольористикы.

Прото можеме видіти образкы, на котрых мастерско намалювано коні, од праісторичных часів аж до сучасности. Мож позерати на шедевры світового малярства, на котрых найдеме лем три-кольоры з русиньской фаны.

Окрем того, можеме сой віртуально походити і пообзерати з каждого місця просторы прим. австрийской нацийональной бібліотекы, старого міста в Єрусалимі, ци нацийонального музею в Делі в Індиі. Онедолга функцийональніст аплікаций буде пошырена о Art Recognizer, што мож схоснувати, коли нажыво одвиджаме музеі – старчыт лем образ вказати до телефона, а отримаме полны інформациі про нього. Дотля лем експонаты трьох музеів сут поміщены в апликациі: Dulwich Picture Gallery в Лондоні, Art Gallery в Сидней та National Gallery of Art в Вашынґтоні.

Радийо Лем.фм заохочат до позераня на творы русиньскых артистів, признаных як загальносвітова культурна спадковина – споминаного Енди Варголя і Юрия Новосільского.

фото горі – пресовы материялы.