Того тыжня кічныт ся листопад/новембер, а од заране зачне ся послідній місяц 2016 рока – груден/децембер. Єдны ся тішат, бо по студеных місяцях, скоро гейбы приде яр, але другы боліют – кєд нам скоро летит – то знак, же маме мало часу і фурт ся старієме. Але конец листопада/новембра принюс на Лемковину Филипівку – 40-дньовий піст, котрий закінчыт ся такой Різдвяныма Святами. Піст тот, в примірі лемківского боку Карпат, зачал ся згідно з юлияньскым календарьом, інакше як на Пряшівскій Руси, де вірны грекокатолицкой Церкви піст зачали за григорияньскым календарьом дакус перше.
Піст і період духового вытишыня не вадит орґанізувати чысленны культуральны подіі на цілій Карпатскій Руси. Про тоты і інчы подіі – очывидно – в днешнім проґрамі з Пряшова: «Говорить Пряшів». Як все, буде традицийна рамівка, а в днешній Перличці радия Русин.фм найдете ґаздівскы порады. Перша з них про продукцию молока і годівлю ялівок. Друга порада буде про напады волків на уці в селі Нижний Дубовец. Гев предовшыткым ждеме ґаздів з нашых русиньскых сел. 🙂
Іщы лем ґу памяти – о нецілий тыжден, бо в понедільок 5. грудня/децембра т.р., Русины з Лемковины будут празднувати своє нацийональне свято – Ден Русина в Польщы. Памятайме.
Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.
Коментарі