«Говорить Пряшів» – пятниця, 20.00 год.

Часом так маме, што не знаме, што повісти. Ріжні то быват, але ним ся повіст немудро, ліпше трираз передумати, а пак конче або выповісти, або ніт.

Днес як раз такій ден настал, што не знаме, як заповісти премєру поучытельного проґраму «Говорить Пряшів», якій іде просто з центру русиньской культуры на Пряшівскій Руси – Пряшова. Ой, кілько раз в тым речыню выступило слово Пряшів… То лем доказ на вагу того міста, так в давній, як і днешній русиньскій істориі. Бо тото, што тепер, то о хвилю уж буде історийом. Може по кус і мы ґу тому даме своіх пят ґрайцарів.

Переходячы до основы. В премєровым голосі з Пряшова рекомендуєме звернути Вашу увагу на Нашых Целебритів. Буде про Осифа Раца з Руского Керестура, економічного діяча, якій основал русиньску кооперативу, мал млын, а і давал муку партизантам. В меджевоєнным періоді русиньскій культурний діяч, а по ІІ Світовій Войні місцевы русиньскы комуністы го не цінили. А што в Книжници? Но, гын стріча з Марийом Мальцовском та єй твором – Маминка, а в Припоминайці Теодозия Латтова повіст про єдну бабску мудріст.

Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.