Ґрекокатолицька харіта одкрыла в Снині Дім святого Пантелеймона

Ґрекокатолицька харіта Пряшів (ҐКХ) зачала в новых просторах почас 2022-го року в Снині забезпечовати здравотну старостливость хворым в обыстях через Аґентуру домашньой здравотной старостливости (ADOS – Agentúra domáce ošetrovateľskej starostlivosti) і соціалны порады посередництвом Соціалного центра Снина.

У віторок 8-го септембра 2022-го року ҐКХ офіціално в Снині одкрыла новы просторы Дому святого Пентелеймона, котры посвятив владыка Петро Руснак, апостольскый адміністратор Пряшівской архієпархії і братіславскый єпарха.

Помогла парохія

В Снині Ґрекокатолицька харіта Пряшів діє од 2001-го року. Служба ADOS Charitas была обще першов служвоб на теріторії міста і протопресвитеріату Снина. Тота выникла в тім самім році і забезпечовала службы здравотной старостливости в обыстях. Од того часу была ҐКХ із свойов службов ADOS на штирьох різных місцях. І зато глядали ся просторы, котры бы были добры про выконованя той службы.

Подарило ся то вдяка парохії Снина – Берегы і адміністраторови парохії отцьови Даніелови Шарішскому. Просторы были вдяка парохії зреконштруованы в роках 2018 аж 2021. Інвестіцію до реконштруцкії просторів буде харіта сплачати почас 15-ох років, і в аренді їх має од новембра 2021-го року.

Навщівлюють понад 20 пацієнтів

Домашню здравотну старостливость забезпечують сестры ADOS у співпрацу з амбулантныма лікарями, шпеціалістами, пацієнтом і його родинов.

Головным цільом є выконовати вшытко, што підтримує здравя або помагать выздоровити, припадно помагать ку покійній смерти в природнім соціалнім оточіню. Подля ҐКХ штораз веце людей потребує домашню здравотну старостливость, іде головно о хронічно хворых ці безвладных пацієнтів із онколоґічныма діаґнозами, сеніорів, але і молодшых.

Актуално в рамках ADOS в Снині роблять дві сестры, котры денно навщівлять довєдна 20 і веце пацієнтів у їх обыстях. Таку саму амбулатну службу забезпечує Ґрекокатолицька харіта і в місті Пряшів од року 2000.

Одкрыли і соціалный центер

Ку 1-му апрілю того року в Снині створили ся і одповідны условії про службу шпеціалных соціалных порад, кедь своє фунґованя почав Соціалный центер Снина. Центер помагать різным ґрупам жытелів – залежным на алкоголі ці наркотіках, людям без домова, сеніорам, здравотно зневыгодненым, людям і родинам в нужді, часточно і біженцям із Україны.

Поміч соціалных порад в рамках центра є забезпечована формов особного розговору і гляданя выходу з даной сітуації.

„Орьєнтовати ся хочеме скоріше на тых, котры терплять досправдовов нуждов, і котрых спостерігають духовны отці, місто Снина, і іншы села а парохії у протопресвитеріаті Снина і Меджілабірці, припадно нашы парохіалны харіты,“ повів директор Ґрекокатолицькой харіты Пряшів Петро Валічек.

Соціалный центер в рамках єдного місяця поможе і 20-ом людям, а тота соціална служба є безплатна.

Одтеперь має харіта про свої службы вже офіціално одкрыты властны просторы в Домі святого Пантелеймона. На посвячіня тых просторів владыком Петром Руснаком пришли і представителі Пряшівского самосправного краю, міста Снина і орґанізацій, котры з ҐКХ співпрацують.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА