„Ґуна і сын“ в русиньскім музею

В Словацькім народнім музею – Музею русиньской културы в Пряшові буде дня 11-го октобра 2016-го року о 16.00 год. святочно одкрыта выставка під назвов „Ґуна і сын – Гармонія“.

Выставка є присвячена Юлійови Ґунови, выробцьови орґанів, фісгармоній і піан, котрый ся народив у 1882 в Ужгороді. По заснованю фірмы на выробу музичных інштрументів в Пряшові додавав свої музичны інштрументы і робив їх оправы на теріторії днешньой Словакії, Польщі, Чехії і Мадярьска. Маїтельом двох оріґіналных фунґуючіх фісгармоній од Юлія Ґуны є Ян Брегові зо Шарішскых Лук, котрый їх запожычав на выставку вєдно із додобвым текстовым матеріалом і фотоґрафіями.

„Навщівників заінтересує і тота менше знама капітола особностей міста Пряшів, котры в руху історії майже впали до забытя, но притім вплыв їх уменя є видительный і в сучасности. Одкрытя выставкы буде обогачене граньом на тых інштрументах, котрым звучаючі тоны ани десятьлітя не одобрали на красі. Посудити то годны навщівници вшыткых віковых катеґорій, нелем знателі музикы ці історії,“ інформовав Словацькый народный музей  – Музей русиньской културы в Пряшові.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА