Густо і голосно в Рускій Бурсі

В минулу пятницю, 18. вересня, в Рускій Бурсі было барз голосно од співів і густо од гостів, a вшытко за справом особливых школярів. З візитом приіхали студенты Університету Третього Віку з Хжанова, а было іх близко 50, не рахуючы штыріножных участників стірчы. Студенты пробывали в недалекій Креници на тыжньовій прогульці. На закінчыня вакацийного турнусу подумали одвидіти Ґорлиці.

Спільна стріча (спільна не лем зато, же з членами Стоваришыня Руска Бурса, але i з молодежом з ансамблю Терочка, якій діє при Бурсі) зачала ся од короткого вводного слова про історию Бурсы, про тото, чым Стоваришыня занимало ся колиси і чым занимат ся тепер. Пак, студенты, а треба зазначыти, же были то барз голодны знаня студенты, одвиділи бурсяну бібліотеку і звиділи Ізбу Памяти Івана Русенка. Інтересувало іх вшытко і тіж о вшытко ся звідували. Великє ожывліня принесла наступна част стірчы – спільне двопоколіньове співаня. Студенты были уж зрыхтуваны – мали слова і знали мелодиі пару співанок, понеже в попередніх днях, іщы в Креници, брали участ в варштатовых стрічах м.ін. про лемківску музыку, веденых Андрийом Трохановскым. Концертово запрезентували вшытко, чого ся навчыли, а сміло мож речы, же в тых вывченых співанках – то Терочка была барже публиком. Ролі ся одвернули, коли молодіж заспіала і заграла своі репертуаровы співанкы, якы барз скоро зімали тіж старшы школярі. Спільным співом не было бы кінця, але далека дорога домів ждала, зато по почастунку і памятковій ґруповій знимці перед Учытельом і Будительом, студенты по барз теплым пращаню поіхали до Хжанова.

Студентам так сподабала ся Терочка і атмосфера в Рускій Бурсі, же уж зачали плянувати наступний приізд, котрий – як застерегли – мусит быти попереджений ревізитом.