«Гіст в ЛЕМ.фм: Станіслав Криціньскій» – четвер, 10.30 год. та 21.30 год.

Тілько што вказала ся публикация «Низкій Бескід в фотоґрафіі Станіслава Криціньского». Побесідували сме з автором знимок, жебы дознати ся, одкале взяло ся заінтересуваня опустошеныма просторами полудньово-східньой Польщы, коли оно пришло і што з того выникнуло.

А выникнуло барз вельо. Вєдно з інчыма особами Станіслав Криціньскій спілреализувал інвентаризацийно-документацийну «Акцию Опис – Лемковина», з того пішло «Надсаня», котре переформило ся в інвентаризацийно-ремонтовы таборы. «Надсаня» ремонутвало цмонтері головні в Бєщадах, але як почуєте в бесіді – єдного рока попросили іх о выремонтуваня цмонтеря в Королику Волошскым, а в наступных роках зробили цмонтір в Дошні, дале в Балутянці, Тарнавці і Вислочку.

В нашій бесіді Станіслав Криціньскій оповіл о початках выіздів в горы, о тым, як принимали іх місцевы, чом найбарже любил іздити сам, а тіж розповіл історию о тым, як в 1987 році піше вертали з камаратом з Ватры в Бортным до Вільхівця і як «догнал» іх в Свіржовій Рускій трактор з причыпом, на котрій вертали дальшы ватряне. Зато, же вшыткы были в «ватряных» гуморах, трактор іхал сам, а решта продолжала радуваня зо стрічы на причыпі…

Станіслав Криціньскій оповідат і о ремонті креста при хыжы Буряків, о мастері дубового листя і розмаітым інчым.

Слухайте в четвер 2. мая 2024 р. о год. 10.30, повторіня того самого дня о год. 21.30, а пак в суботу 4. мая о 9.00 год. Запрашаме!