«Голосы Русинів Підкарпатя» – середа, 18.10 год.

Професія коваля фурт была честованов на Підкарпатю, та і не лем на Підкарпатю. В періоді  натуралной выробы вшыткы желізны предметы мож было купити ці обміняти на їдло лем в кузни.

Млинарь, доктор, сященик, учiтель, коваль – професії, котры выносили їх носителів на уровень сільской арістокрації. А русиньскый фолклор просто переповненый казками і леґендами про смілого і міцного коваля, котрый спасать світ од зла.

Радує то, же у наш час ковальскый промысел не пропав, а нарубы, дістав нове дыханя. Зато герой нашого днешнього выданя «Голосів Русинів Підкарпатя» є коваль із села Яківскоє Поляньской теріторіалной громады – Петро Чурило.

Петро Петровіч – оверсный чоловік, котрый пережыв нелегке, але інтересне жытя, має много облюбленых занять і роботу у себе на кузни наладив міцно. Зато она у нього мыта, а люди із заказками устройили ся у шор на чотыри-пять місяців. Жыє наш герой за прінціпом: «Честь довкола!»

Слухайте «Голосы Русинів Підкарпатя» в середу 9-го юла 2025 р. о 18.10 год., або повторіня в четверь 10-го юла о 4.30 год. і в суботу 12-го юла о 11.00 год. за русиньскым часом.